ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានប្រកាសថារាជរដ្ឋាភិបាលកម្ពុជានឹងដាក់បញ្ចូលបន្ថែមទៀតនូវទ្រព្យសម្បត្តិដូនតាចូលជាបញ្ជីបេតិកភណ្ឌពិភពលោក ស្របពេលដែលកម្ពុជាមានសម្បត្តិបេតិកភណ្ឌចំនួន៩ ត្រូវបានដាក់បញ្ចូលរួចហើយ។

ថ្លែងក្នុងពិធីបិទកីឡាជាតិលើកទី៣ និងកីឡាជនមានពិការភាពលើកទី១ នៅពហុកីឡដ្ឋានជាតិមរតកតេជោ សម្ដេចតេជោ ហ៊ុន សែន បានលើកឡើងនូវចំណុចចំនួន៣សំខាន់ទាក់ទងនឹងមោទនភាពជាតិដោយរួមមាន ស្នាដៃរបស់ដូនតាគ្រប់ជំនាន់ដែលបានបន្សល់ទុកដល់កូនចៅជំនាន់ក្រោយ អរគុណដល់កីឡាករដែលបានខិតខំងើបឈរប្រមូលដើមទុនសម្បត្តិវប្បធម៌ក្រោយឆ្នាំរំដោះ១៩៧៩ និងក្រសួងវប្បធម៌ និងស្ថាប័នពាក់ព័ន្ធដែលបានខិតខំដាក់បញ្ជូលស្នាដៃទាំងនេះចូលជាបេតិកភណ្ឌពិភពលោក។

សម្ដេចថា៖ «សង្ឃឹមថានឹងបញ្ចូលតទៅទៀតនូវទ្រព្យសម្បត្តិដូនតារបស់យើង»។

ក្បាច់គុនល្បុក្កតោរបស់ខ្មែរត្រូវបានអង្គការយូណេស្គូដាក់ចូលជាសម្បត្តិបេតិកភណ្ឌអរូបីមនុស្សជាតិកាលពីយប់ថ្ងៃទី២៩ ខែវិច្ឆិកា ឆ្នាំ២០២២ ដែលធ្វើឱ្យសម្បត្តិវប្បធម៌របស់កម្ពុជាចំនួន៩ត្រូវបានដាក់បញ្ចូលការពារជាអន្តរជាតិ។

កម្ពុជាមានសម្បត្តិបេតិកភណ្ឌពិភពលោករបស់កម្ពុជាដែលបានចុះបញ្ជីរួមមាន តំបន់អង្គរ របាំព្រះរាជទ្រព្យ ល្ខោនស្រមោលស្បែក ឬល្ខោនស្បែកធំ ប្រាសាទព្រះវិហារ ចាប៉ីដងវែង ល្បែងទាញព្រ័ត្រ ប្រាសាទសំបូរព្រៃគុក និងល្ខោនខោលវត្តស្វាយអណ្ដែត៕